Македонски Олимписки Комитет се простува од великанот Трајан Јовковски
Со длабока тага и неизмерна почит, Македонскиот Олимписки Комитет и целокупното спортско семејство се простуваат од една од најмаркантните фигури во нашата спортска историја – легендарниот кајакар на диви води, Трајан Јовковски.
Заминувањето на нашиот истакнат спортист, спортски работник и горд член на елитниот „Клуб на великаните“ при МОК (од 2000 година), остава ненадоместлива празнина во македонскиот спорт.
Трајан Јовковски не беше само спортист; тој беше синоним за храброст, непокорност и спортска извонредност. Преку својата блескава кариера како повеќекратен шампион на Македонија и на Југославија, како долгогодишен капитен на репрезентацијата и врвен тренер, тој го трасираше патот на кајакарскиот спорт во нашата земја. Неговите историски достигнувања на светските првенства, кога се вброи меѓу најдобрите во светот, засекогаш ќе останат врежани во златните страници на нашата нација.
Во овие мигови на тага, Македонскиот Олимписки Комитет изразува најдлабоко и најискрено сочувство до семејството Јовковски, до неговите пријатели, соработници и до целата кајакарска заедница. Ние изгубивме спортски херој, но добивме вечна инспирација за сите идни генерации македонски спортисти.
Посмртните останки ќе бидат изложени утре во капелата на градските гробишта во Бутел периодот од 09:30 до 10:30 часот, каде што пријателите и почитувачите ќе можат да му оддадат последна почит на великанот.
Нека му е светол патот и вечна слава!